ཟླ་6ཚེས་27ཉིན། ཞིང་ཆེན་སྲིད་གཞུང་གིས་2022ལོའི་ལོ་སྟོད་དུ་ཞིང་ཆེན་ཡོངས་ཀྱི་དཔལ་འབྱོར་འཁོར་སྐྱོད་བཀོད་གཏོང་བརྙན་འཕྲིན་ཁ་པར་ཚོགས་འདུ་འཚོགས། ཞི་ཅིན་ཕིང་ཀྱི་སྤྱི་ཁྱབ་ཧྲུའུ་ཅི་སི་ཁྲོན་དུ་གཟིགས་ཞིབ་གནང་བར་ཕེབས་རྒྱུའི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་དང་། ཞིང་ཆེན་གྱི་ཏང་གི་འཐུས་མི་ཚོགས་ཆེན་ཐེངས་བཅུ་གཉིས་པའི་བཀོད་སྒྲིག་དོན་འཁྱོལ་ནན་ཏན། “ཆབ་སྲིད་ལ་སྣང་ཆེན་དང་། འཕེལ་རྒྱས་དམ་འཛིན། དམངས་འཚོར་ཕན་འདོགས་པ། བདེ་འཇགས་འགན་ལེན”བཅས་ཀྱི་ལས་ཀའི་སྤྱིའི་བསམ་ཕྱོགས་ལ་དམ་པོར་དམིགས་ཏེ་དཔལ་འབྱོར་འཁོར་སྐྱོད་དེ་ལུགས་མཐུན་བར་མཚམས་སུ་མཐའ་འཁྱོངས་ཧུར་ཐག་བྱས་ནས་དཔལ་འབྱོར་གྱི་གཞི་རྩའི་ལས་དོན་བརྟན་པོ་ཡོང་བ་བྱེད་དགོས་པའི་ནན་བཤད་གནང་བ་རེད། ཞིང་ཨུད་ཀྱི་རྒྱུན་ཨུ་དང་ཧྲེང་ཀྲང་གཞོན་པ་ལི་ཡུན་ཙེ་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་བ་རེད།

ཚོགས་འདུའི་ཐོག་འདི་ལོ་ནས་བཟུང་ཞིང་ཆེན་དེ་ཡོངས་ཀྱིས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དོན་འཁྱོལ་ནན་ཏན་བྱས་ནས་རིམས་ནད་སྔོན་འགོག་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ནུས་ལྡན་གྱི་བྱ་ཐབས་སྤྱད་དེ་སྔོན་དཔག་ལས་བརྒལ་བའི་ཕོག་ཐུག་ལ་ཁ་གཏད་གཅོག་པ་དང་དཔལ་འབྱོར་བརྟན་པོའི་ངང་ཆེ་ས་ནས་ཞིང་ཆེན་དེ་ཡོངས་ཀྱི་དཔལ་འབྱོར་འཁོར་སྐྱོད་བརྟན་པོའི་ངང་འཕར་བའི་རྣམ་པ་ཐོན་མོད། འོན་ཀྱང་དུས་ཐུང་ནང་འཕར་ཚད་ཆག་པའི་གནོན་ཤུགས་སྔར་བཞིན་ཅུང་ཆེན་པོ་ཡོད། ས་གནས་ཁག་དང་སྡེ་ཁག་སོ་སོས་ངེས་པར་དུ་མིག་སྔའི་གནས་བབ་ལ་ངོས་འཛིན་གསལ་པོ་བྱས་ཏེ། ཡིད་ཆེས་བརྟན་པོ་དང་། དཀའ་ངལ་ལ་མི་འཛེམ་པར་མདུན་དུ་སྐྱོད་པ། དམིགས་འབེན་དང་ལས་འགན་གཏན་འཁེལ་བྱས་ནས་སྟོབས་ཤུགས་ཡོད་རྒུ་བཏོན་ནས་དཔལ་འབྱོར་འཛུགས་སྐྲུན་དམ་འཛིན་བྱས་ཏེ། དཔལ་འབྱོར་གྱི་དམིགས་ཚད་གཙོ་བོ་གང་མགྱོགས་སླར་གསོ་དང་བསྐྱར་འཕར་ཡོང་བར་སྐུལ་འདེད་གཏོང་དགོས།

ཚོགས་འདུའི་ཐོག་བླང་བྱ་བཏོན་དོན། སྲིད་ཇུས་དོན་འཁྱོལ་དང་ཕན་འབྲས་ཐོན་རྒྱུར་དམ་འཛིན་ནན་པོ་བྱས་ཏེ་ནུས་ལྡན་གྱི་དགོས་མཁོ་རྒྱ་ཆེར་གཏོང་རྒྱུར་ཤུགས་སྣོན་རྒྱག་པ་དང་ཆབས་ཅིག་མ་འཇོག་དང་ཕྱིར་གཏོང་ནང་འདྲེན་གྱིས་དཔལ་འབྱོར་འཕར་རྒྱུར་སྐུལ་ཁྲིད་བྱེད་པའི་ནུས་པ་ཆེ་རུ་བཏང་ནས“ཤིང་རྟ་གསུམ”གྱི་ནུས་པ་མཉམ་དུ་འདོན་ཐུབ་པ་བྱེད་དགོས། ཁྱབ་ཁོངས་གཙོ་བོའི་འདེགས་སྐྱོར་ལ་ཤུགས་སྣོན་བརྒྱབ་ནས་དེའི་བརྟན་པོའི་ངང་འཕར་བར་བྱེད་པའི་འདེགས་སྐྱོར་ནུས་པ་འདོན་སྤེལ་གང་ལེགས་བྱས་ཏེ་ཐོན་ལས་གསུམ་བསྐྱར་འཕར་ཐུབ་རྒྱུར་སྐུལ་འདེད་གཏོང་དགོས། འགན་སྲུང་ལམ་སྲོལ་འཐུས་ཚང་དུ་གཏོང་བ་དང་། རྒྱུ་རྐྱེན་གཙོ་བོས་གན་རྒྱ་བཟོ་བའི་འགག་རྩའི་དཀའ་གནད་ཧུར་ཐག་སེལ་བ། ཕན་འབྲས་ཆེ་ཞིང་བདེ་བླག་གི་ལས་ཀའི་ལམ་སྲོལ་མུ་མཐུད་འཛུགས་དགོས། ཕྱོགས་ཁག་གི་འགན་འཁྲི་ནན་དུ་གཏོང་བ་དང་། ས་གནས་ཀྱི་གཏོགས་ཁོངས་འགན་འཁྲི་མུ་མཐུད་ཆེ་རུ་གཏོང་བ། དུས་བཀག་བརྡ་ཁྱབ་ལམ་སྲོལ་འཛུགས་པ། “བརྟན་པོ་གཉིས་དང་འགན་ལེན་གཅིག”གི་ལས་དོན་དོན་འཁྱོལ་བྱ་རྒྱུར་དམ་འཛིན་ཏན་ཏིག་བཅས་བྱེད་དགོས།

ཚོགས་འདུའི་ཐོག་ཞིང་ཆེན་འཕེལ་སྒྱུར་ཨུ་ལྷན་དང་། ཞིང་ལས་དང་གྲོང་གསེབ་ཐིང་། དཔལ་འབྱོར་དང་ཆ་འཕྲིན་ཅན་ཐིང་། ཚོང་དོན་ཐིང་། ནོར་སྲིད་ཐིང་། རང་བྱུང་ཐོན་ཁུངས་ཐིང་། ཞིང་ཆེན་བསྡོམས་རྩིས་ཅུས་བཅས་དང་ལུའུ་ཀྲོའུ་གྲོང་ཁྱེར་དང་། ཏ་ཀྲོའུ་གྲོང་ཁྱེར། ཁྲེང་ཏུའུ་གྲོང་ཁྱེར་བཅས་ཀྱིས་སྔ་རྗེས་སུ་སྤེལ་རེས་གཏམ་བཤད་བྱས་པ་རེད། ཞིང་ཆེན་གྱི་ཐད་གཏོགས་འབྲེལ་ཡོད་སྡེ་ཚན（སྡེ་ཚན）དང་གྲོང་ཁྱེར（ཀྲོའུ）ཁག་གི་སྲིད་གཞུང་གི་འགན་འཁུར་བློ་མཐུན་ཚོགས་འདུར་ཞུགས་ཡོད་པ་རེད།